Idirlíon níos fearr a chruthú do leanaí

Is leanbh é thart ar dhuine as gach triúr úsáideoirí idirlín, agus tá rochtain á fáil ag na leanaí sin ar an Idirlíon ag aoiseanna níos óige ná riamh thar raon éagsúil gléasanna. Tá siad ag caitheamh níos mó agus níos mó dá gcuid ama ar an Idirlíon, ag brabhsáil na meán sóisialta, ag imirt cluichí ar líne agus ag úsáid aipeanna soghluaiste. Tarlaíonn sé seo go minic gan maoirseacht aosach.

Cé go gcuireann an tIdirlíon go leor deiseanna ar fáil don fhoghlaim, don chumarsáid, don chruthaitheacht agus don tsiamsaíocht, cruthaíonn sé rioscaí áirithe freisin d'úsáideoirí leochaileacha amhail leanaí.

Is féidir le leanaí a bheith neamhchosanta ar ábhar agus iompar díobhálach ar líne, amhail cibearbhulaíocht, gnéaschiapadh, pornagrafaíocht, foréigean, nó féindochar. Teastaíonn freagraí éifeachtúla chun iarmhairtí diúltacha ar a bhforbairt chognaíoch, shóisialta agus mhothúchánach a chosc.

Is mian leis an gCoimisiún a chinntiú go bhfuil timpeallacht shábháilte spreagúil ar líne ag daoine óga agus iad ag plé le teicneolaíochtaí nua agus ag caitheamh ama ar líne ag an am céanna. Go deimhin, beidh teicneolaíochtaí nua amhail an intleacht shaorga, nascacht mhéadaithe, agus réaltacht bhreisithe agus fhíorúil ina gcúis le hathrú tábhachtach ar an gcaoi a mbíonn leanaí rannpháirteach sa tsochaí agus ar an gcaoi a n-idirghníomhaíonn siad inti.

Leis an straitéis Eorpach i ndáil le hIdirlíon níos fearr do leanaí, cuirtear sraith beart comhlántach ar fáil, idir mhaoiniú, chomhordú agus fhéinrialáil chun cabhrú le timpeallacht níos sábháilte ar líne a chruthú. 

Déanann an Coimisiún cómhaoiniú ar Ionaid d’Idirlíon Níos Sábháilte sna Ballstáit (arna chomhordú ag Insafe), agus is í an tairseach d’Idirlíon Níos Fearr do Leanaí an pointe iontrála aonair le haghaidh acmhainní agus chun dea-chleachtais a chomhroinnt ar fud na hEorpa. Is é an príomhchúram atá orthu feasacht a mhúscailt agus litearthacht dhigiteach a chothú i measc mionaoiseach, tuismitheoirí agus múinteoirí. Déanann siad ábhar mí-úsáide gnéasaí leanaí ar líne a chomhrac freisin trína líonra beolínte (INHOPE). 

Gné ríthábhachtach den tsábháilteacht ar líne is ea feasacht a mhúscailt: Gach bliain, déantar Lá na Sábháilteachta Idirlín a cheiliúradh i dtimpeall 170 tír, agus téann sé i bhfeidhm ar na milliúin duine ar fud an domhain trí imeachtaí agus gníomhaíochtaí éagsúla.

Liostáil leis an nuacht is déanaí ar an ábhar seo agus tuilleadh.